Prentmet Logo

Fréttir

Jóhanna Ólafsdóttir gefur út ljósmyndabók

Út er komin ljósmyndabók eftir Jóhönnu Ólafsdóttur ljósmyndara og er hún unnin í samstarfi við Ljósmyndasafn Reykjavíkur. Prentmet sá um prentun á bókinni og Helga Gerður Magnúsdóttir, dóttir Jóhönnu, sá um bókarhönnun, uppsetningu og umsjón með útgáfu.

 

Í bókinni gefur að líta úrval verka eftir Jóhönnu Ólafsdóttur ljósmyndara. „Jóhanna er ein af fáum íslenskum kvenljósmyndurum af sinni kynslóð sem starfað hefur allan sinn feril sem ljósmyndari. Hún tók þátt í samsýningum á árunum 1980 og 1987 og árin 2012 og 2014 voru verk hennar sýnd á yfirlitssýningum um íslenska ljósmyndasögu þar sem þau vöktu verðskuldaða athygli.

 

Þetta er fyrsta einkasýning Jóhönnu hér á landi og fylgir henni vegleg sýningarskrá. Jóhanna er afar næmur mannlífsljósmyndari eins og myndasyrpur hennar af hversdagslegum viðburðum, svo sem mannlífsmyndir úr miðbæ Reykjavíkur og fólki að sækja póst í pósthólf, bera glöggt vitni. Fegurð mannlífsins sem birtist þar sem enginn býst við henni, heillar Jóhönnu fremur en það sem er upphafið. Hennar galdur felst í að gefa auganu þá fjarlægð og umgjörð sem þarf til þess að skynja fegurðina í augnablikunum.“

 

Prentmet óskar Jóhönnu Ólafsdóttur, Ljósmyndasafni Reykjavíkur og öllum þeim sem komu að gerð þessarar bókar til hamingju með glæsilegt verk.

 

Nú stendur yfir sýning hjá Ljósmyndasafni Reykjavíkur í Grófsal, Hafnarhúsi.

 

 

johannaolafsdottir 1

 

johannaolafsdottir 2

 

 

Prentmet ehf. © 2015. Allur réttur áskilinn. | Vefhönnun: Björgvin Rúnar Valentínusson & Helgi Þór Guðmundsson